Përfaqësuesja e Argjentinës ka fituar me rezultat 2-0 ndeshjen ndaj Polonisë në ndeshjen e tretë të Grupit C në kuadër të Kupës së Botës “Katar 2022”, duke u kualifikuar kështu nga pozita e parë në raundin e 1/8-tës.
Argjentina nuk ka lejuar befasi në ndeshjen e fundit të grupit duke fituar falë golave të shënuar në pjesën e dytë në takimin e zhvilluar në ‘Stadium 974’.
Pjesa e parë e ndeshjes u karakterizua me dominim të kombëtares Albiceleste, të cilët krijuan shumë raste me anë të Lionel Messit dhe Julian Alavarez, por pritjet e tyre të gjitha u mohuan nga portieri Wojciech Szczesny. Përveç rasteve, Argjentina pati edhe një penallti të akorduar nga VAR-i në minutën e 39-të, por edhe këtu Szczesny ishte i pakalueshëm duke pritur goditjen e Messit dhe dërguar ekipet në pushim me rezultat 0-0.
Në pjesën e dytë, Argjentina ishte e papërmbajtshme duke rritur rastet dhe duke gjetur shpejt rrjetën dy herë për të siguruar fitoren dhe kualifikimin.
Goli i parë erdhi në minutën e 46-të me anë të Alexis Mac Allister, i cili shënoi për 1-0, ndërsa Alvarez (67’) u përkujdes për të dërguar epersinë në 2-0.
Deri në fund të ndeshjes pati edhe disa raste tjera nga Argjentina, por pa arritur të gjejnë golin dhe ndeshja u mbyll me rezultat 2-0.
Pas kësaj fitore, Argjentina kualifikohet nga pozita e parë, ndërsa Polonia nga vendi i dytë.Albiceleste do të ndeshen në raundin tjetër me Australinë, ndërsa Polonia që do luajë ndaj Francës.
Meksika ka gjetur fitoren e parë të këtij Botërori duke mundur Arabinë Saudite, por ajo ishte edhe e fundit për skuadrën e drejtuar nga “Tata” Martino, pasi golavarazhi e nxori të tretë në grup sepse fitoi vetëm me shifrat 2-1.
Meksikanëve u duhej një fitore e thellë për të qenë të sigurt për kualifikimin e tyre dhe tentuan në pjesën e parë ne çdo mënyrë që të gjenin rrjetën e portës saudite, pasi skuadra e Renard nuk dukej se kishte më freskinë e ndeshjeve të para për të tentuar një tjetër mrekulli.
Dy golat në fillimin e pjesës së dytë i dhanë zemër Meksikës, e cila ishte e ndërgjegjshme se varej edhe nga golavarazhi i polakëve. Lozano dhe Çavez provuan në çdo mënyrë të gjenin rrjetën në minutat e mbetura të sfidës, me gjuajtjet drejt portës saudite që nuk u ndalën deri në fund. Por ishte Al Dousari ai i cili shënoi në shtesë, duke shuar ëndrrat e meksikanëve për një kualifikim të mundshëm të tyre.