Brazili ka marrë një goditje të madhe pas fitores me Serbinë me rezultat të pastër 2-0. Ylli më i madh i Selecao, Neymar u largua nga loja 11 minuta para fundit të ndeshjes, pas një lëndimi të pësuar nga një ndërhyrje e ashpër e mbrojtësit kundërshtar.
Menjëherë dolën fotot ku shihej këmba e ënjtur e brazilianit, derisa sot ka ardhur lajmi i rëndë për Përfaqësuesen braziliane.
Neymar do të mbetet jashtë fushave të blerta në sfidat ndaj Zvicrës të hënën dhe ndaj Kamerunit që është e fundit në grupe.
Së paku kështu kanë njoftuar mediat braziliane, ku sulmuesi i Paris Saint Germain do t’i humbas së paku dy ndeshje por frika është e madhe te brazilianët.
Gjithsesi mbetet të shihet nëse Neymar do të rikthehet në fazën e eliminimit direkt, pasi kyçi i këmbës së tij dukej jashtëzakonisht keq.
Por nuk është vetëm ky lajmi i keq, pasi në dy ndeshjet e ardhshme do mungojë dhe mbrojtësi anësor Danilo, një tjetër titullar i rëndësishëm për brazilianët.