Një ngjarje e rëndë tronditi dje Shqipërinë, ku humbën jetën babë e bir në Shkodër për shkak të përmbytjeve. Makina me të cilën udhëtonte Pjetër dhe Jason Rushaj u mor nga rrjedha e fortë e “Përroit të Thatë” në Bogë.
Për këtë tragjedi, ka reaguar dhe presidenti i Federatës Shqiptare të Futbollit, Armand Duka. Përmes një postimi në Facebook, Duka ka zbuluar se Jasoni ishte një futbollist i talentuar që po rritej në radhët e Akademisë së Futbollit Djelmnia Shkodrane. Presidenti ngushëlloi familjen dhe Akademinë e Futbollit.
“I pikëlluar nga ngjarja tragjike e ndodhur dje në Bogë të Shkodrës ku rrjedha e ujit i mori jetën Pjetër e Jason Rrushajt, babë e bir. Kjo fatkeqësi e madhe që na ka prekur të gjithëve, pasi 14-vjeçari Jason Rrushaj ishte një futbollist i talentuar që po rritej në radhët e Akademisë së Futbollit Djelmnia Shkodrane.
Në emër të gjithë komunitetit të futbollit, dua t’i shpreh ngushëllimet më thella familjes Rrushaj, të afërmve, miqve dhe Akademisë së Futbollit Djelmnia Shkodrane për këtë humbje të rëndë. Uroj që Zoti t’i japë forcë për të kaluar këtë moment të vështirë. U prehsh në paqe Jason, engjëlli që u nda shumë shpejt nga ne për t’iu bashkuar parajsës!”, shkruan Armand Duka.
Së fundmi klubi i Vllaznisë bën me dije se Jason ishte pjesë e akademisë së tyre, ndërsa përmes një reagimi në rrjetet sociale u shpreh ngushëllime familjarëve.
“Ndarja nga jeta në mënyrë tragjike dje në Bogë e Pjetër dhe Jason Rrushajt ka qenë një ngjarje e rëndë për të gjithë, përfshirë këtu edhe komunitetin e futbollit pasi Jason ishte një lojtar me perspektivë qê po rritej tek Akademia e Futbollit “Djelmnia shkodrane”..
KF Vllaznia i shpreh ngushëllimet më të sinqerta familjes Rushaj, e po ashtu edhe Akademisë së Futbolllit “Djelmnia shkodrane” për këtë humbje të madhe. U prehsh në paqe Jason!”-shkruan Vllaznia.
Brenda makinës ndodhej dhe vajza e Rushajt po kjo e fundit ka arritur të shpëtoj dhe ndodhet jashtë rrezikut për jetën. Moti i keq ka përfshirë ditët e fundit Shqipërinë, ku qyteti më problematik aktualisht mbetet Shkodra. Reshjet e dendura të shiut kanë përfshirë dhe Tiranën, Durrësin, dhe Vlorën.