Arb Manaj ka gjetur golin e parë me Slaven Belupon, ekipin ku u transferua në merkaton e verës nga turqit e Keciorengucu. Sulmuesi dardan realizoi një nga golat e suksesit 0-6 në Kupën e Kroacisë përballë Nedelisce.
Ishte minuta e 28’ kur 24-vjeçari nga Klina dërgoi topin në rrjetën kundërshtare dhe kaloi në avantazh të dyfishtë Belupon, që më pas realizoi edhe katër gola të tjerë dhe kompletoi triumfin tenistik.
Slaven Belupo siguroi kualifikimin në çerekfinalet e Kupës së Kroacisë, ndërkohë që në kampionat renditet në vendin e katërt pas javës së 15-të.
Manaj, i cili numëron tri ndeshje dhe një gol me përfaqësuesen e Kosovës, shpreson ta “bëjë sefte” edhe në kampionat, me Belupon që në fundjavë sfidon në shtëpi Lokomotivën e Zagrebit.
Kujtojmë se te Salven Belupo luan edhe sulmuesi tjetër i Kosovës, Arbër Hoxha, i cili po kalon një super formë këtë sezon duke bërë diferencën.
Kohët e fundit emri i tij është lakuar për të pranuar ose më saktë për të marrë një ftesë për të përfaqësuar Shqiëprinë, por deri tani s’ka asgjë konkrete.